हेटौंडा, मकवानपुर। हेटौंडा उपमहानगरपालिका–१५ स्थित डाइभरडाँडामा आज (शनिबार) दिउँसो भएको बस दुर्घटनामा परी १० जना घाइते भएका छन्। जिल्ला प्रहरी कार्यालय, मकवानपुरका अनुसार दिउँसो करिब ३ः२० बजे वीरगन्जबाट हेटौंडातर्फ आउँदै गरेको ना ५ ख २९७० नम्बरको यात्रुबाहक बसको ब्रेक फेल भएपछि श्रृंखलाबद्ध ठक्कर दिँदै दुर्घटना भएको हो।
अनियन्त्रित बनेको बसले सुरुमा विपरीत दिशाबाट आइरहेको अनटेस्ट कारलाई ठक्कर दियो। त्यसपछि सोही दिशातर्फ गइरहेको ना ८ ख ४४० नम्बरको ट्यांकरलाई पछाडिबाट ठक्कर दिएको प्रहरीले जनाएको छ।
श्रृंखलाबद्ध ठक्करपछि पनि नरोकिएको बस करिब १०० मिटरजति अगाडि बढेर सडक छेउमा रहेको रुखमा ठोक्किएपछि मात्र रोकिएको थियो।
दुर्घटनामा बसमा सवार ४ जना र कारमा सवार ६ जना गरी कुल १० जना घाइते भएका छन्। घाइतेहरूलाई स्थानीयवासी र सुरक्षाकर्मीहरूको सहयोगमा उद्धार गरी हेटौंडा अस्पतालमा उपचारका लागि पठाइएको छ। प्रहरीका अनुसार घाइतेमध्ये ६ जनाको अवस्था मध्यम रहेको छ भने ४ जनाको अवस्था सामान्य छ।
दुर्घटनामा कारमा बढी क्षति पुगेको छ भने ट्यांकरको पछाडिको भाग सामान्य क्षतिग्रस्त भएको छ। घटनाबारे थप अनुसन्धान जारी रहेको जिल्ला प्रहरी कार्यालय, मकवानपुरले जनाएको छ।
