वीरगन्ज । पर्सा र बारामा सुरक्षाकर्मीहरुले ठूलो परिमाणको स्रोत नखुलेको रकम सहित तीनजनलाई पक्राउ गरेको छ । नेपाल–भारत सीमा क्षेत्रमा सक्रिय सशस्त्र प्रहरी बल र नेपाल प्रहरीले छुट्टाछुट्टै कारबाहीमा १८ लाख रुपैयाँभन्दा बढी अवैध नगदसहित तीन जनालाई पक्राउ गरेको हो।
उनीहरूले प्रयोग गरेका तीन वटा मोटरसाइकल पनि नियन्त्रणमा लिइएको छ। प्रारम्भिक अनुसन्धानबाट बरामद भएको रकम हुण्डी कारोबार र अवैध चोरी पैठारीसँग सम्बन्धित रहेको खुलेको छ। सशस्त्र प्रहरी बल, नेपाल प्रहरी सीमा सुरक्षा गुल्म वीरगञ्जले दुई छुट्टाछुट्टै कारबाहीमा १८ लाख रुपैयाँ नगदसहित दुई व्यक्ति र उनीहरूले प्रयोग गरेका दुई मोटरसाइकल नियन्त्रणमा लिएको छ।
विशेष सूचनाको आधारमा खटिएको सशस्त्र प्रहरीको टोलीले वीरगञ्ज महानगरपालिका–१६, वीरगञ्ज भन्सार कार्यालयको चेकजाँच विन्दुभन्दा करिब ५० मिटर अगाडि त्रिभुवन राजपथ सडक खण्डमा भारतबाट नेपालतर्फ आउँदै गरेको बीआर ०५ एटी ०४७५ नम्बरको मोटरसाइकल रोकेको थियो।
मोटरसाइकलमा सवार वीरगञ्ज महानगरपालिका–२ छप्कैयाका १९ वर्षीय राहुल कुमार तिवारीले मोटरसाइकलको एयर फिल्टर बक्समा लुकाई छिपाई ल्याउँदै गरेको १३ लाख रुपैयाँ नेपाली नगद फेला पारेको थियो। तिवारीलाई नगद र मोटरसाइकलसहित नियन्त्रणमा लिइएको थियो।
सोही दिन अर्को टोलीले वीरगञ्ज महानगरपालिका–१६ स्थित भन्सार गेट नजिकै भारतबाट नेपालतर्फ आउँदै गरेको ना ४७ प ९७१० नम्बरको कालोरनीलो रङको हिरो ग्लेमर मोटरसाइकल रोकेको थियो।
मोटरसाइकलमा सवार बाराको प्रसौनी गाउँपालिका–२, प्रसौनीका ४० वर्षीय कौशल कुमार गुप्ताले शरीरका विभिन्न भागमा लुकाई छिपाई ल्याउँदै गरेको ५ लाख रुपैयाँ नेपाली नगद फेला पारेको थियो।
गुप्तालाई नगद र मोटरसाइकलसहित नियन्त्रणमा लिइएको सशस्त्र प्रहरी नायव उपरीक्षक एवं सूचना अधिकारी देवेन्द्र बहादुर सिंहले जानकारी दिए ।
पक्राउ परेका दुवै व्यक्तिले अवैध रूपमा चोरी पैठारी गरी रकम नेपाल भित्र्याउन खोजेको प्रारम्भिक अनुसन्धानबाट खुलेको छ। दुवै घटनामा संलग्न व्यक्ति, नगद र मोटरसाइकललाई थप अनुसन्धान तथा कारबाहीका लागि वीरगञ्ज भन्सार कार्यालयमा बुझाइएको छ।
यसैगरी, विशेष सूचनाको आधारमा खटिएको जिल्ला प्रहरी कार्यालय बाराको टोलीले सिमरा चोकदेखि एयरपोर्टतर्फ जाँदै गरेका एक युवकलाई चेकजाँच गर्दा १३ लाख ७ हजार ५ सय रुपैयाँ नगदसहित पक्राउ गरेको छ।
पक्राउ पर्ने व्यक्ति पर्सा जिल्लाको वीरगञ्ज महानगरपालिका–१६ का २० वर्षीय सुरज कुश्वाहा रहेको जिल्ला प्रहरी कार्यालय बाराले जनाएको छ। उनलाई सिमरा उपमहानगरपालिका–२, एयरपोर्ट रोडमा कालो रङको झोला बोकी शंकास्पद रूपमा हिँडिरहेको अवस्थामा पक्राउ गरिएको हो।
प्रहरी नायव उपरीक्षक बेद प्रकाश जोशीको नेतृत्वमा खटिएको टोलीले झोलाको चेकजाँच गर्दा नेपाली हजार दरको १,०६७ थान, पाँच सय दरको ४८० थान, र सय दरको ५ थान गरी कुल १३ लाख ७ हजार ५ सय रुपैयाँ फेला पारेको जानकारी दिएको छ।
पक्राउ परेका कुश्वाहाको साथबाट विभिन्न बिल, भौचर र सागर मनि ट्रान्सफर वीरगञ्ज लेखिएको स्ट्याम्पसमेत बरामद भएको प्रहरीले जनाएको छ। प्रारम्भिक अनुसन्धानबाट यसलाई हुण्डी कारोबारसँग सम्बन्धित गतिविधि भएको शंका गरिएको छ।
हाल घटनासम्बन्धी हुण्डी कारोबार शीर्षकमा मुद्दा दर्ता गरी थप अनुसन्धान अगाडि बढाइएको प्रहरीले जानकारी दिएको छ।
