जेठ २९, बारा । सिम्रौनगढ नगरपालिका वडा नम्बर ११, ८ र भगवानपुर जोड्ने सडक खण्डको निर्माण कार्यमा व्यापक भ्रष्टाचार देखिएको छ। एमाले प्रदेश सांसद राजपति जायसवालको प्रदेश सरकारको बजेटबाट निर्माणाधीन यो सडक हाल माटोमै सिधा ढलान गरिएको अवस्थामा छ, जसले गुणस्तरीय निर्माणमा गम्भीर प्रश्न उठाएको छ।
स्थानीय बासिन्दा र सर्वसाधारणले दिएको जानकारीअनुसार, मापदण्डविपरीत निर्माणको पूर्व तयारीस्वरूप ढुंगा, ग्राभेल तथा कम्प्याक्सन (माटो दबाउने कार्य) नगरी सडक ढलान गरिएको छ। यसबाट सडक दीर्घकालीन प्रयोगमा छिट्टै भत्किने निश्चितप्रायः रहेको उनीहरूको भनाइ छ।
त्यस्तै, ढलानमा प्रयोग गरिएको सामग्रीको गुणस्तरसमेत अत्यन्तै कमजोर देखिएको छ। प्राप्त तस्बिरहरूमा रड पर्याप्त मात्रामा प्रयोग नगरिएको, प्रयोग गरिएका सामग्रीहरू धुलाम्य भएको र ढुंगा छनोटमा समेत लापरबाही भएको देखिन्छ। निर्माण स्थलमा सुरक्षा तथा कामदार सुरक्षासम्बन्धी कुनै सावधानीसमेत अपनाइएको छैन।
स्थानीयले निर्माणको निरीक्षण गर्न सम्बन्धित निकायलाई पटक–पटक आग्रह गरिरहे पनि सुनुवाइ नभएको गुनासो गरेका छन्। निर्माण कार्यको अनुगमनमा सरोकारवाला निकाय उदासीन देखिनुले निर्माण व्यवसायी र ठेकेदारसँग मिलेमतो भएको आशंका गर्न थालिएको छ।
