काठमाडौं। अमेरिकाले आज (आइतबार) दिउँसो ४ बजेतिर ठूलो संख्यामा नेपालीलाई एकसाथ डिपोर्ट गर्दैछ। अध्यागमन विभाग स्रोतका अनुसार, करिब ५० जनाको हाराहारीमा नेपालीहरू काठमाडौं आइपुग्ने अनुमान छ, जुन अहिलेसम्मकै एकै पटकमा डिपोर्ट गरिएका नेपालीहरूको सबैभन्दा ठूलो संख्या हुनेछ।
डोनाल्ड ट्रम्पले जनवरी २०, २०२५ मा राष्ट्रपतिको शपथ लिएपछि हालसम्म अमेरिकाले १४० जना नेपालीलाई डिपोर्ट गरिसकेको छ। अमेरिकी अध्यागमन कानुन उल्लंघन गरेको आरोपमा उनीहरूलाई निष्कासन गरिएको हो।
त्रिभुवन अन्तर्राष्ट्रिय विमानस्थलमा आइपुगेपछि डिपोर्ट गरिएका नेपालीहरूलाई नेपाल प्रहरीलाई बुझाइनेछ, जसले मानव तस्करबारे सोधपुछ गर्नेछ। ट्रम्पले राष्ट्रपति निर्वाचन अभियानदेखि नै आप्रवासीमाथि कडाइ गर्ने घोषणा गरेका थिए। उनले शपथ लिएलगत्तै अवैध आप्रवासीलाई निष्कासन गर्ने कार्यकारी आदेशमा हस्ताक्षर गरेका थिए। ट्रम्प प्रशासनले १,३६५ नेपालीसहित १४ लाखभन्दा बढी आप्रवासीको निष्कासन सूची सार्वजनिक गरेको थियो।
सन् २०२४ मा ३५ जना नेपाली डिपोर्ट भएका थिए। ट्रम्प राष्ट्रपति भएपछि मासिक रूपमा बाइडेनको कार्यकालको वार्षिक डिपोर्ट संख्या बराबर नै नेपालीहरू डिपोर्ट भइरहेका छन्।
