वीरगन्ज । वीरगन्ज महानगरपालिका वडा नम्बर ४ मा निर्माण गरिएको शंखधर साख्वाँ पार्कको शनिबार उदघाटन गरिएको छ । नेपाल संवतका प्रवर्तक तथा राष्ट्रिय विभूति शङ्खधर साख्वाको नाममा निर्माण गरिएको शङ्खधर साख्वा पार्क शनिबार साँझ उद्घाटन गरिएको हो ।
हरि खेतान क्याम्पस अगाडि रहेको पार्कको उद्घाटन खानेपानी मन्त्री प्रदीप यादव, मधेस विश्वविद्यालयका उपकूलपति प्राध्यापक डा.दीपक शाक्य, वीरगञ्ज महानगरपालिका नगर प्रमुख राजेशमान सिंह लगायत विभिन्न व्यक्तिहरुले वेलुन उडाएर गरिएको थियो ।
पार्कमा हरियाली क्षेत्र, विश्रामस्थल, बालबालिकाका लागि खेलकुद क्षेत्र, तथा रातिको समयमा पर्याप्त उज्यालो व्यवस्था जस्ता सुविधाहरू समावेश गरिएको छ । खुला स्थानको अभाव भइरहेका बेला यो पार्क स्थानीयवासीका लागि विश्रामस्थलको रुपमा बनेको छ । पार्क आइतबार (जेठ २५ गते)देखि सर्वसाधारणका लागि खुला गरिने महानगरले जनाएको छ ।
वीरगन्ज महानगरपालिकाका मेयर राजेशमान सिंहका अनुसार प्रत्येक दिन बिहान ६ बजेदेखि ९ बजेसम्म र साँझ ६ बजेदेखि ९ बजेसम्म नै पार्क खुला रहनेछ । पार्कमा घुम्नका लागि अहिले कुनै शुल्कको व्यावस्था नगरेको मेयर सिंहले बताए ।
