वीरगन्ज । वीरगञ्ज महानगरपालिकाका मेयर राजेशमान सिंहले वीरगञ्ज क्षेत्रमा देखिएको विद्युत आपूर्तिको समस्या र नारायणी अस्पतालमा भएको विद्युत अवरोधको विषयमा संघीय सरकारको ध्यानाकर्षण गराएका छन् ।
मेयर सिंहले स्वास्थ्य तथा जनसंख्या मन्त्री प्रदीप पौडेललाई ६ बुँदे ज्ञापनपत्र बुझाउँदै नारायणी अस्पतालको आईसीयू र सीसीयू वार्डमा विद्युत सर्ट भई बिरामीको ज्यान जोखिममा परेको घटनाको उच्चस्तरीय छानबिन र दोषीमाथि कारबाहीको माग गरे । उनले अस्पताल विकास समितिलाई बर्खास्त गर्न, सार्वजनिक अस्पतालहरूमा न्यूनतम पूर्वतयारी सुनिश्चित गर्न, प्रभावित बिरामीको विवरण सार्वजनिक गर्न र क्षतिपूर्तिको व्यवस्था गर्नसमेत माग गरे । यसअघि, उक्त घटनामा संलग्न इलेक्ट्रीसियन इन्चार्ज सञ्जीव गुप्तालाई निलम्बन गर्ने निर्णय भइसकेको छ ।
यस्तै मेयर सिंहले मंगलबार नै ऊर्जा मन्त्री दीपक खड्कालाई भेटेर वीरगञ्जमा भइरहेको अघोषित लोडसेडिङ र त्यसले जनजीवनमा पारेको नकारात्मक प्रभावबारे जानकारी गराए । वीरगन्जमा बढ्दो गर्मीमा पटक–पटक विद्युत अवरुद्ध हुँदा अस्पताल, विद्यालय, घरपरिवार र उद्योगहरूमा परेको समस्या उनले औंल्याए । उनले दीर्घकालीन समाधानका साथै अस्पताल र विद्यालय जस्ता अत्यावश्यक सेवामा ट्रान्सफर्मर मर्मत वा पुनःस्थापनाको माग गरे । ऊर्जा मन्त्री खड्काले तत्कालै नेपाल विद्युत प्राधिकरण मधेस प्रदेशका प्रमुखलाई समस्या समाधानका लागि निर्देशन दिएका छन् ।
