मोरङ। मोरङमा अभद्र व्यवहार मुद्दामा अनुसन्धान भइरहेका एक थुनुवाको उपचारका क्रममा मृत्यु भएको छ। झापाको दमक नगरपालिका–१ का २८ वर्षीय पुण्यबहादुर श्रेष्ठको मंगलबार बिहान विराटनगरको कोशी अस्पतालमा मृत्यु भएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए।
डीएसपी जोशीका अनुसार, श्रेष्ठलाई अभद्र व्यवहार मुद्दाको अनुसन्धानका क्रममा हिरासतमा राखिएको थियो। जेठ १५ गते म्याद थप गरी अनुसन्धान अघि बढाइएको थियो। बिहान ९:२० बजेतिर एक्कासि ज्वरो आउने, पेट दुख्ने र श्वासप्रश्वासमा समस्या देखिएपछि उनलाई अस्पताल लगिएको थियो, जहाँ बिहान ११:३० बजेतिर उनको मृत्यु भयो। यसअघि पनि हिरासतमा रहेका बेला बिरामी परेपछि प्रहरीले उनलाई अस्पताल लगेको थियो।
प्रहरीका अनुसार, लागुऔषध सेवनकर्तासमेत रहेका श्रेष्ठ लामो समयदेखि परिवारको सम्पर्कमा थिएनन्। उनी आपराधिक पृष्ठभूमिका व्यक्ति भएको र यसअघि विभिन्न प्रहरी कार्यालयबाट ४ पटक मुद्दा चलिसकेको रेकर्ड रहेको डीएसपी जोशीले बताए। ती मुद्दामध्ये ३ पटक लागुऔषध ऐन र १ पटक अभद्र व्यवहारअन्तर्गतका थिए। पछिल्लो पटक विराटनगरमै साइकल चोरी गर्न खोज्दा साइकलका धनीलाई हातपात र दुर्व्यवहार गरेको किटानी जाहेरी परेपछि उनलाई पक्राउ गरिएको थियो।
श्रेष्ठको शव कोशी अस्पतालमै राखिएको छ। मृतकका आफन्तलाई खबर गरिसकिएको र उनीहरू आएपछि थप प्रक्रिया अघि बढ्ने डीएसपी जोशीले जानकारी दिए।
