काठमाडौं । टर्कीको इस्तानबुलमा रूस र युक्रेनबीच भएको दोस्रो वार्तामा युद्धविराम सम्बन्धी कुनै सहमति हुन सकेन। यसअघि मे १६ (२०२५) मा इस्तानबुलमै भएको वार्ताले युद्धविराम सम्झौता नगरी युद्धबन्दी आदानप्रदान गर्ने सहमति गरेर टुंगिएको थियो।
सन् २०२२ देखि सुरु भएको युद्ध समाप्त गर्ने सम्बन्धी कुनै प्रगति नभए पनि युद्धबन्दीहरूको आदानप्रदान र युद्धमा मारिएका हजारौं सैनिकहरूको शव आदानप्रदान गर्ने सम्बन्धी सहमति भएको अलजजिराले जनाएको छ।
दुवै पक्षका प्रतिनिधिमण्डलबीच सोमबार (जुन २, २०२५) इस्तानबुल सहरमा रहेको ओटोमनकालीन सिरागान दरबारमा वार्ता भएको थियो। वार्तामा दुवै पक्षले युद्धबन्दी तथा युद्धमा मारिएका ६ हजार सैनिकहरूको शव आदानप्रदान गर्ने र गम्भीर घाइते सैनिकहरू र २५ वर्ष मुनिका सम्पूर्ण युद्धबन्दीहरू आदानप्रदान गर्न सहमति भएको समाचारमा बताइएको छ।
रूसी प्रमुख वार्ताकार भ्लादिमिर मेदिन्स्कीले यो सहमतिअनुसार प्रत्येक पक्षबाट कम्तिमा एक हजार युद्धबन्दी आदानप्रदान हुनेछ। यो संख्या गत महिनाको वार्तामा सहमत भएको युद्धबन्दी आदानप्रदानभन्दा बढी हो।
युक्रेनी राष्ट्रपति भोलोदिमिर जेलेन्स्कीले दुवै पक्षले टर्कीमार्फत सहमतिको डकुमेन्ट आदानप्रदान गरेको र युक्रेनले युद्धबन्दीहरूको अर्को समूह मुक्त गर्ने तयारी गरिरहेको बताएका छन्। अलजजिरा
