काठमाडौं । प्रधानमन्त्री एवम् एमाले अध्यक्ष केपी शर्मा ओलीले पार्टीलाई बचाउन नेकपाकालमा केही अराजनीतिक कदम चाल्नुपरेको बताएका छन्। शनिबार (जेठ १७, २०८२) काठमाडौंमा राष्ट्रिय स्वास्थ्यकर्मी महासंघ नेपालको पाँचौँ राष्ट्रिय महाधिवेशनमा उनले यस्तो बताएका हुन्।
उनले एमाले पार्टी फुटाउन तत्कालीन समयमा देशी–विदेशी शक्ति लागिपरेको जिकिर गर्दै आफूले एमालेलाई सकिनबाट जोगाएको बताए। यद्यपि, उनले तत्कालीन समयमा कुन कदम अराजनैतिक थियो भन्नेबारे भने स्पष्ट पारेनन्।
ओलीले नेकपा (एकीकृत समाजवादी) का अध्यक्ष माधवकुमार नेपाललक्षित टिप्पणी गर्दै ‘पार्टी फुटाएर गएर एकीकृत बनाउने?’ भन्दै कटाक्ष गरे। उनले एकता अभियानका संयोजक वामदेव गौतमप्रति पनि कटाक्ष गर्दै पार्टी एकजुट राख्नेतिर नउभिने र पार्टी फुटाउन हुँदैन नभन्ने अनि एकता अभियान चलाउने भनेर फुस्रो नारा दिएर विभाजनमा मद्दत गरेको आरोप लगाए।
ओलीले नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले नेकपाकालमा अध्यक्ष भएर पार्टी फुटाउने काम गरेको आरोप लगाए। उनले तत्कालीन सभामुख अग्नि सापकोटाले पनि सभामुख भएर असंवैधानिक कदम चालेको आरोप लगाए।
प्रधानमन्त्री ओलीले देशभर जातीय, धार्मिक, भाषिक र भौगोलिक विभाजन सिर्जना गरेर देशलाई अहित गर्न खोजिएको भन्दै आफूहरूले राष्ट्रिय एकताको अभियान चलाएको बताए। उनले एमाले सिध्याउने देशी–विदेशी शक्तिको उद्देश्य रहेको र त्यसको वाहक पार्टीभित्रकै नेताहरू भएको दाबी गरे। ओलीले पार्टी फुटाउनमा प्रचण्ड, अग्नि सापकोटा, माधव नेपाल र झलनाथ खनालको हात रहेको आरोप लगाए। उनले पार्टीभित्रका शीर्ष नेताहरूबाटै समस्या आएको र तलका कार्यकर्ताले पार्टी नफुटाऊँ भने पनि ‘साइना, छिमेकी र साथीभाइ’ का कारण केही कार्यकर्ता विभाजनमा गएको बताए।
