वीरगञ्ज। नारायणी अस्पतालको सघन उपचार कक्ष (आईसीयू) र कार्डियाक केयर युनिट (सीसीयू) मा गएराति करिब बजे अचानक सर्ट सर्किटका कारण विद्युत् आपूर्ति अवरुद्ध भएको छ। अक्सिजन र जीवनरक्षक उपकरणमा निर्भर जना बिरामीको ज्यान जोखिममा परेको यो घटनाले अस्पताल प्रशासनको संवेदनशीलता र तयारीप्रति गम्भीर प्रश्न खडा गरेको छ।
विद्युत् आपूर्ति तीन घण्टासम्म बन्द रहँदा आईसीयू र सीसीयूमा रहेका बिरामी र तिनका परिवार सदस्यहरू अत्यन्त तनावमा परेका थिए। गर्मी र उपकरण नचल्दा बिरामीहरूको अवस्था झन् नाजुक बनेको थियो। अस्पताल प्रशासन सम्पर्कविहीन रहेको भन्दै चिकित्सक र कुरुवाहरूले तीव्र आलोचना गरेका छन्। मेडिकल सुपरिटेन्डेन्ट (मेसु) डा. चुमनलाल दास निद्रामै रहेको आरोप लागेको छ भने निमित्त मेसु डा. चितरन्जन साह पनि विद्युत् अवरोधका विषयमा अनभिज्ञ रहेको बताइएको छ।
बिरामीका परिवारले अस्पताल प्रशासनमाथि ज्यानसँग खेलवाड गरेको कडा आरोप लगाएका छन्। उनीहरूले बिरामीलाई अन्य अस्पतालमा लैजान दबाब दिएको भए पनि निजी अस्पतालमा ठाउँ नभएको र आर्थिक अभावले समस्या झनै बढेको बताएका छन्। वीरगञ्जबासीहरूले सार्वजनिक अस्पतालमा यस्तो संवेदनशील अवस्थामा प्रशासनको गैरजिम्मेवारपनप्रति आक्रोश व्यक्त गर्दै तत्काल सुधार गर्न सरकारसमक्ष माग गरेका छन्।
करिब तीन घण्टापछि मात्र विद्युत् आपूर्ति पुनः सुचारु भएपछि बिरामीले केही राहत पाएका छन्। यद्यपि, यसले नारायणी अस्पतालको सेवा प्रणाली र आपतकालीन व्यवस्थापनमा ठूलो सुधार आवश्यक रहेको देखाएको छ। यो घटनाले देशभर सार्वजनिक स्वास्थ्य सेवामा सुधार आवश्यक रहेको सन्देश दिँदै, बिरामीहरूको ज्यानसँग खेलवाड गर्न नहुने चेतावनी दिएको छ।
