काठमाडौं । अन्तरिम सरकारका नवनियुक्त प्रधानमन्त्री सुशीला कार्कीले पदभार ग्रहण गरेकी छन् । जेनजी पुस्ताको २७ घण्टाको आन्दोलनले केपी ओली नेतृत्वको दुईतिहाई बहुमतको सरकार ढालेपछि शुक्रबार अन्तरिम सरकारको प्रधानमन्त्री नियुक्त कार्कीले आज बिहान सिंहदरबारमा पदभार ग्रहण गरेकी हुन् ।
सिंहदरबार स्थित गृहमन्त्रालयको नवनिर्मित भवनमा प्रधानमन्त्री कार्यालय राखिएको छ । प्रधानमन्त्री कार्कीले त्यसअघि बिहान लैनचौरस्थित शहीद स्मारक पुगेर माल्यार्पण गरेकी थिइन् । प्रधानमन्त्री सुशीला कार्कीले जेनजी आन्दोलनको क्रममा भएको आगजनी र तोडफोडका घटना सुनियोजित हुन सक्ने बताएकी छन् ।
पदभार ग्रहण समारोहमा सम्बोधन गर्दै उनले सो कुरा बताएकी हुन् । ‘यो प्लान वे, षडयन्त्रै भएको हो कि भन्ने लागेको छ,’ कार्कीले भनिन् । उनले यसबारे छानबिनपछि सत्यतथ्य बाहिर ल्याउने बताइन् । उनले सिंहदरबार, संसद भवन, सर्वोच्च अदालत, व्यापारिक कम्प्लेक्स लगायतका सरकारी कार्यालयहरुमा भएको आगजनी लज्जास्पद भएको बताइन् ।
उनले आफू रहरले प्रधानमन्त्री नभई सबै नेपालीको चाहाना र माग अनुसार प्रधानमन्त्री भएको दावी गरिन् । उनले भनिन्, ‘यो उमेरमा आफूले किन जनताको सेवा नगर्ने भनेर मात्रै आएकी हुँ । ६ महिना भन्दा बढी बस्दिन । छिटो भन्दा छिटो निर्वाचन गरि नेतृत्व हस्तान्तरण गर्नुछ । मलाई यहाँहरुको साथ चाहिन्छ ।’
उनले निजामति कर्मचारीहरु, सुरक्षा निकायहरु लगायत सबैको साथ नपाए सम्भव नहुने भएकोले आफूलाई देश निर्माणमा साथ दिन आग्रह गरिन् । अब एकअर्काले आलोचना गर्न छोडेर युवा पुस्ताको चाहना अनुसार काम गर्ने, भ्रष्टाचारको अन्त्य गरी सुशासन कायम गर्ने र समान आर्थिक सुशासन पनि कायम गर्नु रहेको बताईन् ।
